ഓര്‍മ്മകളുടെ പിന്‍വിളികള്‍.

പ്രവാസത്തിന്റെ മര്‍മ്മരങ്ങളില്‍

ചോരവാര്‍ന്ന്‍ കിടന്ന

അവന്റെ ആത്മാവ്

ഒരു പൊടിക്കാറ്റുപോലെ

വീണ്ടും എന്നെ ചുഴറ്റിയെത്തുന്നത്

അവന്‍ മണലില്‍ വരച്ചിട്ട-

ചിത്രങ്ങളായിട്ടായിരുന്നു.

ചൂടിലും ശൈത്യത്തിലും

വിരലുകള്‍ മുക്കി

അവന്‍ വരച്ചിട്ട ചിത്രങ്ങള്‍ക്ക്

 സ്വസ്ഥമാവാന്‍

ചുമരുകള്‍ ഇല്ലായിരുന്നു.

പ്രദര്‍ശന വേദികളില്ലായിരുന്നു.

ശ്വാസപിടച്ചിലുകളുടെ വഴികളില്‍

അവന്റെ ചിരികള്‍ മയങ്ങിക്കിടപ്പുണ്ട്.

മരുഭൂമിയുടെ ദാഹത്തില്‍-

ഇനിയൊരിക്കലും കാണാത്ത-

അവന്റെ അസ്ഥികൂടവും പൊതിഞ്ഞു

ഒരു മണല്‍ക്കൂന ഇന്നും ഇവിടെയുണ്ട്

അവന്റെ വിയര്‍പ്പു കുടിച്ചു വറ്റിച്ച-

മരുഭൂമിയില്‍ ഇന്നും

ആ മര്‍മ്മരങ്ങളുണ്ട്

ഇന്നും ആ മണ്‍വിളികളുണ്ട്.