ഇനിയും മരിക്കാത്ത
സത്രങ്ങളാണ് കടലുകള്
ഓളങ്ങള് ദൂതുകളും.
തിരിച്ചറിയാനാവാത്തവിധം
വെന്തുമരിച്ച
മനുഷ്യബന്ധങ്ങള്ക്ക്
ആ സത്രമാണ് അഭയം.
ചിതകൊളുത്തിയ മാതൃവൃക്ഷവും
കെടുത്തിയ ചെറുനാളങ്ങളും
കല്ലിട്ടുമൂടിയ ഉറവകളും
ഈ സത്രത്തിന്റെ അടിവേരുകളാണ്.
ആഴങ്ങളുടെ നീലിമയില്
അവ വീണ്ടും
പൂക്കുന്നതും പടരുന്നതും
ഈ സത്രത്തിന്റെ വിലാസത്തിലാണ്.
ചിലപ്പോഴൊക്കെ ആ വിലാസത്തില്
കടലുകള് ഗര്ഭംധരിച്ചു
സുനാമികളെ പ്രസവിക്കാറുണ്ട്.
കടല് അതിനെ
ആത്മാക്കളുടെ തീര്ത്ഥാടനം എന്ന് വിളിക്കുന്നു
നിങ്ങള് സുനാമിയെന്നും.